قصيدة مكتوبة للسيده رقيه (ع)
الشاعر الحاج ثائر الربيعي:
الهوى عالي وراسك برمحه التوه
شعره من راسك اجت ويه الهوى
بيها دم نحرك لكيت
كمت اشم بيها وبجيت
شعره من راسك اجت ويه الهوى
++++++++++
طفله واعتابي البواچي بس اناشغ يگضي ليلي.
ادري ماترجع ولكن ماگدرت اقنع دليلي
بين نبضاتي مسافه اتوسل الدگه تجيلي
والنفس لو ردت اجرّه الا اوگفله اعله حيلي
اوگف اعله االناگه عني مو بعيد
ومن ردت بيديني الوح الراس اريد
شعره بيدي سلميت
گمت اشم بيها وبچيت
شعره من راسك اجت ويه الهوى
+++++++++++
شعره لو ايام عمري بيدي احسها وذكرتني
فتحت ابعيني صورها ابزغري حد ما ضيّعتني
فوگ مهدي چني اشوفك فرفحتلك من بستني
توني احبي والتراچي انته بيدك لبستني
توني اتعلم مشي بكل خطوه اطيح
اسم الله بويه وتبچي اشوفك من تصيح
اهوايه عثراتي دريت
گمت اشم بيها وبچيت
شعره من راسك اجتني اويه الهوى
+++++++++++++
اذكر انه والعليله نلعب وانت تجينه
ونترك اللعبه ونشبگك اغله من كلشي علينه
وتنحرج لمن نسئلك بويه ياهي الاحله بينه
اتكاسر الدمعه بضحكتك تشمنه وتحبب بدينه
وهسه اسئلك منو بينه اكثر حزن
ومنو لكثر تبچي بالليل اليجن
انه واختي اتعذبيت
گمت اشم بيها وبچيت
+++++++++++++
موقف الذابحلي بالي بس يفارگني اريده
شگد جبتلك ماي واعثر وارجع وچم مره اعيده
لـَحَد ما صاحتلي سكنه كافي مايج مايفيد
امثلّم السيف بذبحتك باقيه بنحرك حديده
لازمتّك وانه اسحب بالرمح
ريته ماطالع كبر حلگ الجرح
انه وختي اتشابگيت
باد حيلي ونحنيت
شعره من راسك اجت ويه الهوى
++++++++++++
بخاطري عتبه زغيره وخايفه تزعل عليه
من حضنتك وانته طايح ضلّو ايجرّون بيه
ليش خليت العقيله منك اتفلهن اديه
چان هسه اويه الرضيع امدلله بحظن السچيه
وابني گبري ابينك وبين الگمر
لا احس بالوحشه لا يمي خطر
وبين زوارك صفيت
گمت اشم بيها وبچيت
شعره من راسك اجت ويه الهوى
+++++++++++++
مو طويله ايامي فتره امحسّبه الكلشي حِـسابه
ويّه ما تگضي المسافه ينتهي گلبي عذابه
والحرس كل ساع اسئله يمته نوصل للخرابه
راح افاجئ عمتي زينب واحضن الراس بخضابه
احچايتين احچيها وانهي المسئله
اوياك تاخذ عمري لو ترجع اله
برمشك اشّر لو رضيت
گمت اشم بيها وبچيت
شعره من راسك اجت وي الهوى
ثائر الربيعي
 الشاعر الحاج ثائر الربيعي: الهوى عالي وراسك برمحه التوه شعره من راسك اجت ويه …){kind=link}
ممكن قصيده السيده رقيه
ردحذف