قصائد على لحن يمه اطمنج عليه مكتوبة
ثلاث قصائد مكتوبة على طور يمه اطمنج عليه
اذا اردت قصيدة يمه اطمنج علية مكتوبة انزل للاسفل
تبقى زينب اميره من ترد مو اسيره
لحن ..يمّه اطمنج عليه لملا باسم
تبقى زينب اميره من ترد مو اسيره
عالميمنه وياهه .. يرعاهه .. رجواهه .. يمشي حيدره
عالميسره حاضر .. ويناظر .. ويحاذر .. سبع الكنطره
*
هاي زينب بت علي والكل يعرفون
هاي اميره وبنت امير وما ينكرون
حاضر وياهه علي يمشي ويه الضعون
حيدر ومن ينذكر يتراجف الكون
لو مشت زينب تغمّض كل العيون
هيّه سنّت للخدر بالدنيا قانون
………………
كمّلت درب اخوهه والعزم من ابوهه
زينب مثل حيدر .. عالمنبر .. من يكدر ..يكسر جلمته
لحسين وفّايه .. والغايه .. بحجايه .. تنصر ثورته
زينب الكلهه غيره من ترد مو اسيره
*
ردت بهيبتهه زينب مو سبيّه
صارو لزينب سبايه آل اميّه
بكربله صارت مثل امهه الزجيّه
ساعه ام وساعه اخت بالغاضريه
بيهه مجموعه صفات الهاشميّه
بالضعن من تمشي جن حامي الحميّه
………………
هيّه صارت كفيله هالمره مستحيله
هالحره مشهوره .. منصوره .. مذكوره .. تنصب محكمه
والفارك اخوانه .. عنوانه .. ايمانه .. من باري السمه
الهه ماصح نظيره من ترد مو اسيره
*
عاليتامه ام الخدر تتناكط احساس
مرّه جنهه حسين مرّه جنهه عباس
ذلت يزيد وكيانه وذيج الارجاس
زينب الحره جبل واهل الغدر فاس
من يمر موكبهه لازم توكف الناس
دنكو من عاينوهه شالت الراس
………………
اسعه سعيك تكلّه جلمه منهه تذلّه
انه الاظل بيهه ..واحميهه .. تاليهه .. تنظر كبّتي
والشام اليّه تظل .. ما انذل .. واتدلل .. وابقه بهيبتي
كبّه الهه جبيره من ترد مو اسيره
*
تمشي مشية منتصر ماتلوي الشراع
صدك لو كالو علي من خلّف اسباع
زينب بهيبة مشيهه تلوي الذراع
واحد يحذّر بالآخر ابعد بساع
من علي وعبّاس جمعت كل الاطباع
كبل ماتنكل جدمهه تهتز الكاع
………………
هاي بنت الزجيّه كلهه زود وحميه
ماتمشي مجتوفه .. لللكوفه .. معروفه .. موش مكيده
محّد وصل يمهه .. وكلمهه .. بت امهه .. هاي السيّده
هاي فخر العشيره من ترد مو اسيره
*
هاي امهه فاطمه والدهه حيدر
منهو يكدر يمهه يوصل منهو يكدر
تمشي تتناكط شرف والكون كبّر
قادت الثوره الاميره ودحرت الشر
زينب لسان الفصاحه الما تغير
صارتلهه الشام يعني كلهه منبر
…………………
كلهه غيره وشهامه .. هاي اخت النشامه
والثوره قادتهه .. رايتهه .. شالتهه .. وترفرف غدت
ايتامه اباريهم .. واحميهم .. وارويهم .. يعني اتكفلت
قصّه الهه مثيره .. من ترد مو اسيره
*
بالضعن جدهه محمد حاضر هناك
شاف جبريل ويكله الباري ودّاك
روح وي ام الخدر وعيوني ترعاك
هاك اخذ هاي الملائك كلهه ويّاك
ياحبيبي يامحمد تبجي عيناك
ويّه زينب لاتهم حرّاس الاملاك
……………
لاتهم يامحمد الله بيهه تعهد
لام الخدر زينب .. من يكرب .. لاتتعب .. يابو فاطمه
بنتك نباريهه .. نحميهه .. نفديهه .. ترجع سالمه
خل تطول المسيره من ترد مو اسيره
***
سيد علي المدني
بويه آنه حميده – بس وداعك اريده
بويه آنه حميده – بس وداعك اريده
جمراتي بعيوني – وضعوني – واوسوني – بل ون والدمع
هل ونه تچويني – تاذيـــــني – بونيــــــني – گلبي منگطع
بس وداعك اريده
----
فكري مشغول بسفرتك ضگت الآلآم
يمشن بلوعه وبواچـــــي ذني الايام
بليلي تجرحني وتسلني بويه الاحلام
من هضمهه المر عليه صرت مانام
بويه احچي بصراحه - ماشفت مره راحه
ماتنتهي جروحي – بنص روحي – وبنوحي – دمعاتي حُمر
تدريني بويه ارضه – لولحظه - چن ومضه - لوشخصك يمر
آنه مامره سعيده – بس وداعك اريده
-----
هالضعن يمشي وتلالي صورتك هاي
لحظه لحظه وي مشــينه انـــت وياي
دمعتي جمره لتهلهه بويه عيــــــناي
كبرت بكل ساعه مرت هاذي بلواي
بونه ظلت عيالك - بويه خبرني حالك
حسيت بآمالي – يالغالي – واحوالي - چن طير انذبح
هالغيبه تاذيني – تنهيني – وبعيني – ماشــــفت الفرح
والگلب ردد نشيده – بس وداعك اريده
-----
طفله مهمومه وحزينه حيلي ذبلان
ماشفت كلشي بحياتي بس الاحزان
تدري يابويه بمحـبتك كلبي ولهان
كلشي صرت انت بحياتي إلي عـنوان
عمري انت دليله – لعمي دوم اشتكيله
بالدمعه اشكيله – واحچيله – كل ليله – اتنطر خبر
بچلماته كبرني – صبرني – حيرني – جن كلبه انفطر
مايحسسني وحيده – بس وداعك اريده
-----
لو تمر ظلــــــمه بحياتي انت نبــراس
يجري ذكرك ياحبيـــــــــبي ويه الانفاس
من گبل مايسري ضعني عندي احساس
بويه شــــــفت آنه العلامه بعين عباس
چنه يدري بمسيرك – بويه تلگه مصيرك
ابقه آنه منتظره – متكسره – متحيره – من ضيم الزمن
راسمتك بعيني – وسنيني – تدريني – هضـــمتني المحن
جيتك شو بعيده – بس وداعك اريده
-----
ساعه واسمعهه البواچي بين الاضعون
بويه حسيت بمصيرك وسـط العيون
من شفت كل الهواشـــــم بس ينوحون
كلشي مكتوب بدمعهم من ينـــــظرون
عمتي لمن تصدلي – چنهه تحچي وتگلي
بدمعتهه المشيبه – هالطيبه – لحبَيبَه - وصتني بصبُر
وآنه ارسم الجيه – يوميه – حنيه - تســــــــعد هالعمُر
عمي أومالي بيده - بس وداعك اريده
----
امن الزغر ياوسفه بويه ضدني البين
جرحك وجرح الفواطم صارن اثننن
من مسح راسي يبويه عمي الحسين
گلي يحبـــــــــيبه حمــيده ياضوه العين
انتي عندي امانه – مسلم آنه بمكانه
عمي مسح راسي – باحساسي – وانفاسي - جمره وتلتهب
وناتي مخفيه – ليليه – والبيَّه – نيـــــــــــرانك تشب
منهو شخصك يعيده – بس وداعك اريده
تمت بحمده تعالى
ابو لقاء البهادلي
يمه راحو اخوتي يمه كبرت بلوتي
قصيده على طور يمه اطمنج عليه
للحاج ملا باسم الكربلائي
يمه راحو اخوتي يمه كبرت بلوتي
يايمه وعيونج .ومتونج.دموعج ماتو كل هلي
خلوني يايمه.باحزاني.ومچاني..يتاني جيتكم علي
يمه راحو اخوتي يمه ضاعت رجوتي
〰️〰️〰️〰️〰️〰️〰️
يمه يلزهره اخبرج عن احوالي
اني عكب حسين ابد ماعندي والي
چان عباس القمر يضوي الليالي
وهسه وحدي بلغرب ضاعت امالي
هاي سكنه ورقيه .. زينب راحت سبيه
يايمه خلوني..ضيعوني..دمروني..بمقتل كافلي
يايمه جرحوني..هضموني..بجوني من طاح الولي
يمه راحو اخوتي .. يمه ضاعت رجوتي
〰️〰️〰️〰️〰️〰️〰️〰️
بعد ششكيلج يايمه عن رقيه
بيوم غار حسين اجت تبجي اليه
تكلي عمتي عمي ماجاب الميه
اني اكلها الكفل فوك الوطيه
يمه طيحو كفيلي .. يمه ضربولي عيني
يايمه عباسي ..باحساسي..وبراسي ماشلته ابد
خلاني يايمه..بلحسره..والعبرة..منكسره ..راح ومايرد
يمه راحو اخوتي ... يمه ضاعت رجوتي
〰️〰️〰️〰️〰️〰️〰️〰️
يمه شحجيلج بعد عن كل الانصار
من حبيب وجون هاذا الحامه ع دار
وبعد يمه عابس وهل صار اعصار
وصاح خادم للحسين بلحرب غار
يمه شوفي المنية .. حسين نام على الوطية
يايمه خدامه..عل هامه..نيامه. ومكطعه وصل
وغارت الغيره..بلديره..والحيره مبينه عل حمل
يمه راحو اخوتي ... يمه ضاعت رجوتي
〰️〰️〰️〰️〰️〰️
بويه ياحيدر دكوم الحگ عليه
گوم جيب حسين اخوي ورده ليه
وبطريقك كافلي فوگ الوطية
مگطعه چفوفه ودمع عينه خفيه
بويه اهضمك عليه ... طاح ابن حامي الحميه
يابويه ضربوها..طفوها..وگعوها..عيون اللي كفل
يابويه گطعوها.. خلوها..داسوها..چفوف البطل
يمه راحو اخوتي ... يمه ضاعت رجوتي
〰️〰️〰️〰️〰️〰️
بويه اكلك عن اخوي شسوه بلناس
كام يطبر يمنه يسره وبيده نبراس
يحمل الحمله ويذكرنه ب ابو الساس
صار صنديد اخوي الاسمه عباس
بويه ارفعلي راسك وطفي جمره احساسك
يابويه حملاته.طبراته.وشمخاته اذكرني بيك
من جانت الرايه.والغايه.من هايه فوك اجفوف اديك
يمه راحو اخوتي...يمه ضاعت رجوتي
كلمات خادم اهل البيت
الشاعر علي الدلفي
تعليقات
إرسال تعليق