كلمات قصيدة تمنيت مكتوبة كتابة
كلمات الشاعر أحمد الذهبي
أداء الرادود باسم الكربلائي
تمنيت .. غيمة وعلى جناح السمه
تمنيت .. انزل مطر وكت الضمه
يلتقي ماي وعطش يم النهر
واعصر اعيوني على اشفاه الگمر
تمنيت
◼️◼️◼️◼️◼️
مملكة العش للحمام
لو فگد معنى السلام
يبدي حزنه
واني طيره وعشها ضاع
عمري من بعد الوداع
ماله معنى
ليش ما صرت انه طيف
فوگ رمش الغالي ضيف
وانجمعنه
تسمع وتبجي السنين
اشيحجي عباس الحنين
ويه سكنه
مواضيع .. بيناتنه بگد الهوه
مواضيع .. انفاسي وانفاسه سوه
شنسه واباله الف ذكره وصور
واعصر اعيوني على اشفاه الگمر
تمنيت
◼️◼️◼️◼️◼️
رايحه ريش اعلى ريح
فوگ صدر الغالي اطيح
واشتكيله
اه ترميني على اه
صارت الدنيا وراه
مستحيله
لو جنح عندي واطير
جيت الضامي على بي
راني اجييله
اغسل بدمعي التراب
وامسح الدم بالحجاب
بجفي اشيله
واحاجيه .. عليِّ جره والماجره
واحاجيه .. بعدين ابوسه بمنحره
وفيي اسويله مثل في السجر
واعصر اعيوني على اشفاه الگمر
تمنيت
◼️◼️◼️◼️◼️
امنية ابهاذي الظروف
نجمة ومن بعيد اشوف
هي لحظة
ياخذ العينه ضواي
صدره يتنفس هواي
ما يرفضه
النار اخرها الرماد
واني اخرتي فؤاد
بلايه نبضه
ابلايه ذاكرتي بقيت
جم حرف بسمي نسيت
واسمه احفظه
يعباس .. يا اغلى من ماي الذهب
يعباس .. مي النهر يغلى شعجب
خاف لا طوله استحه ويمك گصر
واعصر اعيوني على اشفاه الگمر
تمنيت
◼️◼️◼️◼️◼️
ليل والعالم غريب
بصحوتي اسمع نحيب
وابمنامي
ماتت حروف الكلام
روحي وبعيني ظلام
وابخيامي
كلشي مات وكلشي نار
حتى دمعاتي الزغار
والاسامي
كم طفل ناعم يليل
بلا ذنب دايسته خيل
وهو ضامي
حرامات .. اني وخواتي بلا غطه
حرامات .. نفتر مثل سرب الگطه
عطشونه واحنه للودام مطر
واعصر اعيوني على اشفاه الگمر
تمنيت
◼️◼️◼️◼️◼️
للنهر چني اعتنيت
ريت عميانه امن اجيت
ما شفتها
عينك البيها انه انام
نايمه بيها السهام
وعاتبتها
جفك اليساوله جيش
گاطعينه مدري ليش
استغربتها
صدرك الدافي الخجول
ساحگه ضلوعه الخيول
امكسرتها
وادوايك .. محتاره اشيلن يا سهم
وادوايك .. والدنيا صارت كلها دم
دمك الزينب وصل ومنها اعتذر
واعصر اعيوني على اشفاه الگمر
تمنيت
◼️◼️◼️◼️◼️
الگاع تحرگني واصيح
مره اوگف مره اطيح
من وصلتك
بين بروحي انكسار
شعري ابيض كله صار
لمه شفتك
هاذي راية وذاك جود
وراس مضروب بعمود
ما عرفتك
جروحك تسولف تريد
تحجي بس صوتك بعيد
ما سمعتك
مواعيد .. يا دنيا ما ظلت بعد
مواعيد .. جان الفرات اخر وغد
ما بقه غير الامل بالمنتظر
واعصر اعيوني على اشفاه الگمر
تمنيت
◼️◼️◼️◼️◼️
#اللهم_عجل_لوليك_الفرج
📝 Tel : للقصائد المكتوبة
https://t.me/bassempoems
* من باب احترام حقوق الآخرين*
*نرجو عدم تغيير روابط الخدمة *
تعليقات
إرسال تعليق