خدمة باسم الكربلائي تقدم
📜قصيدة : ساعة الذبح مكتوبة
كلمات الشاعر : ايهاب المالكي
🎵 طور القصيدة : #بالله_يانهر
لو خذه الجرح .. من ضوه الصبح
والحزن كسر .. للشمس جنح
صدى ايه تره هايه .. ساعة الذبح
◼️◼️◼️◼️◼️
لو شفت الورد ما بي ملامح
يابس غصنه جان وحزنه واضح
لو ذابل لگيته وعطره رايح
ساعتها الحسين لوحده طايح
اذا طاح الحسين الدنيا تخله
وتصير العظائم يمه سهله
حزن بي شي يعرفه الينتبه له
مو اول حزن بس ماكو مثله
يومه يختلف .. ساعة عن الف
عاذر الگلب .. من جفاه يرف
اسى ما مر اجل اخر .. بيها يتضح
◼️◼️◼️◼️◼️
مر ذاك النهر وقاسي فجره
بي يهوى الحسين ودامي نحره
بارد والحوافر تچوي صدره
صحره شفته الما بيها گطره
من تبجي الشمس ويفز نحيبك
نفس ذاك الوكت ذبحوا حبيبك
حيره وتاخذك دمعه وتجيبك
تشعر كل سهل يوكع يصيبك
تنهدم لأن .. يهتز الزمن
بعينك الضوه .. ينگلب جفن
صدى صوتك عسى موتك .. هالوكت يصح
◼️◼️◼️◼️◼️
خيوط الضي اذا يرحن سبايه
مذبوحه الشمس باللحظه هايه
تعرفه اليوم ذاك من البدايه
ساعاته وثوانيه المنايه
ملامح يومك تذكرها تالي
راح تگول اجه حسين على بالي
يعاين بالوجوه وظهره خالي
والوادم ولا واحد موالي
يلتفت ألم .. عالارض علم
والهوه انحسب .. كل نفس سهم
اله رايح ردى طايح .. صخره من سفح
◼️◼️◼️◼️◼️
اكثر يوم بي تتحير انته
رغم ضجة انينك كلشي سكته
نهر الهم يرد اشما عبرته
مهموم ومنيتك مدري يمته
بذاك اليوم تصدف جم رزيه
لكن ما حجوهن يم رقيه
عن دم النحر ما تدري هيه
واشرضت الخيل الاعوجية
غمض ووعد .. تلمح الجسد
اموذر وهمس .. يطلب المدد
لظا نوحك على روحك .. بابه ينفتح
◼️◼️◼️◼️◼️
اذا عالسمه شفت الظلمة تلتم
معناها النحر بي قطّر الدم
ركز عالظلام وكلشي تفهم
وتشوف الدخان الـ عالمخيم
يوم البي سهم ظالم تجره
بعين الكافل يحط مستقره
هذا الـ بالشدايد ما تبره
والزينب تمنه يودي عذره
زينب بحرب .. والفگد صعب
باجر الظعن .. يمشي وي غرب
الوفه دينه نطه عينه .. راسه عالرمح
◼️◼️◼️◼️◼️
عن الطف اذا محد حجالك
وهواي أسئلة تمر على بالك
ذاك اليوم اليجاوب سؤالك
من تسرح اوي الناعي خيالك
من اشراع جفنك حبله ينفل
وعبدالزهره يبده يقره مقتل
يوصل للشمر من سيفه ينسل
من نحر الحسين ابدمه يبتل
يسرد الخبر .. لوعة النحر
تسمع اشجره .. بصدره من حفر
بلا ناصر على حافر .. دمه ينمسح
◼️◼️◼️◼️◼️
📝 Tel : للقصائد المكتوبة
https://t.me/bassempoems
* من باب احترام حقوق الآخرين*
*نرجو عدم تغيير روابط الخدمة *
🔱خدمة محبي باسم الكربلائي🔱
تعليقات
إرسال تعليق